2. Já myndi hefja aðildarviðræður á ný

Viðræður um 35 málaflokka

Regluverki ESB er skipt í 35 samningskafla. Þar er farið yfir hvernig Ísland gæti uppfyllt skuldbindingar aðildar og rætt um mögulegar sérlausnir, undanþágur eða aðlögun þar sem það á við.1

Þetta er því meira en að biðja um tilbúið tilboð. Ísland mótar samningsafstöðu og ESB-ríkin móta sameiginlega afstöðu fyrir hvern kafla.

Hver kafli þarf samþykki

Framkvæmdastjórn ESB metur stöðuna og gerir tillögur, en öll aðildarríkin þurfa að samþykkja ramma viðræðna og að skilyrði séu uppfyllt áður en köflum er lokað. Viðræðunum lýkur ekki fyrr en öllum köflum hefur verið lokað.2

Eldri viðræður hjálpa en leysa ekki málið

Ísland sótti um aðild 2009 og viðræður hófust 2010. Þegar hlé var gert höfðu 27 kaflar verið opnaðir og 11 þeirra lokað til bráðabirgða. Árið 2015 óskaði ríkisstjórnin þess að Ísland yrði ekki lengur talið umsóknarríki.3

Þess vegna liggur ekki sjálfkrafa fyrir að fyrri staða hvers kafla gildi óbreytt. Ísland og ESB þurfa að ákveða hvernig þráðurinn verður tekinn upp og endurmeta það sem hefur breyst.

Hægt er að hætta

Ríkisstjórn og Alþingi á hverjum tíma hafa forræði á þátttöku Íslands í viðræðunum. Já á kjördag tryggir hvorki að samningur náist né að hann verði síðar samþykktur.1